Die afgelope Saterdag was 495 Toyota Hilux-4x4’s deel van die amptelike wêreldrekordpoging om die meeste voertuie van ’n handelsnaam en ’n spesifieke model bymekaar te kry. 
   Die Atlantis-duine het die naweek gewemel van dié bakkies. Die manne van die Wes-Kaapse tak van die Four Wheel Drive Club of South Africa het alles gedoen om die reëlings seepglad te laat verloop en om al die Hiluxe betyds deur die hek te kry.
   Die eerste bakkies het al van voor 07:00 af daar aangekom en die span afblasers het soos ’n goed ge-oliede (Hilux-) enjin geloop en bande afgeblaas vir die sand – vinniger as wat jy kon sê mes! Hulle het die pas volgehou tot net ná 13:00 toe die amptelike telling gemaak is. 
   Dit kon so maklik tot die betowerende 500 gestyg het vir die rekord, maar die agterosse het toe nie in die kraal gekom nie. ’n Handjievol Hilux bestuurders het gejaag om betyds daar te wees, maar kon dit helaas nie maak nie.
   Die 4x4-gees het nietemin hoog geloop en die Hilux-manne en -vroue het met ’n vriendelike glimlag die rekord opgestel.
   Chile hou klaarblyklik die rekord vir die meeste 4x4-voertuie op een slag bymekaar, so ons hier in Suid-Afrika sal dit maar net moet klop. Enige rede om partytjie te hou en rygoed af te show.
Kyk ‘ie foto’s!

Die Arctic Trucks het baie aandag getrek - natuurlik is dit ook Hilux'e!

Die toeskouers het van vroeg al op die groot duin die pragtige prentjie aanskou

Die Land Cruiser Klub se lede het die dag wag gehou om te keer dat almal wild en wakker te kere gaan

Vir die amptelike telling en foto het almal op die duine stelling gekry.

Vier honderd vyf-en-negentig Hilux'e. Mooi, né?