In ’n tyd waarin veral die stilering van Japanese bakkies jou aan iets herinner wat lyk of dit pas iewers op ’n grondpad in die suide van Namibië gerol het, is die stilering van die nuwe Ford Ranger ’n vars bries. 

Man, kyk net na daai mooi bonkige en vierkantige sierrooster. Dis sterk, amper kubistiese stilering. Maar wag, voor ek té diep raak, wil ek volstaan deur te sê dat sy stilering oral respek sal afdwing: van voor die koöperasie of op die parkeer-terrein van ’n plattelandse rugbyklub tot blinkgepoets by jou naaste inkopiesentrum.

Ons hou van: 
Ai, as jy vet gee, voel dit of daai 3.0 TDCi-turbo-diesel (115 kW en 380 Nm) genoeg woema het om die skroefdraad van die as waarom die aarde draai met ’n 19 mm-ringsleutel te strip.

Boonop is die Super Cab-modelle steeds die enigste met die een-en-’n-half kajuit met twee agterdeurtjies om die in- en uitlaai van vrag te vergemaklik. Boonop lyk sy binneruim so mooi soos dié van sommige motors.

Dus, die voorkoms, die turbodiesel en die smaakvol afgewerkte binneruim … (Ja, goed, ek weet die laaste sin klink soos iets uit Tuis, maar ek kan nie help nie.)

Maar …
Die Ranger-reeks sukkel nog steeds voort met die ou Ranger se 4-liter-V6-petrol wat met 154 kW maar sleg uitsak teen die Hilux (175 kW) en die Nissan Navara (198 kW), wat albei petrol-V6’e van dieselfde verplasing het. Dus is jou keuse beperk tot diesel.

Die handrem is een van daai outydse trek-en-draai-affêres wat hier neffens die stuurwiel sit. ’n Konvensionele handrem langs die ratkierie is makliker om te gebruik as jy teen ’n opdraande wil wegtrek.

Maar dis eintlik hare kloof. Die grootste klagte teen die Ranger (en sy Mazda-tweelingbroer) is die effens knap agterdeure van die dubbelkajuit. Die beenruimte is goed, maar jy moet eers sukkel om in te klim.

Hoeveel moet ek hoes?
Vanaf R179 900 vir die 2.5 TD Super Cab Hi-Trail 4x2 (die 80 kW/257 Nm-enjin van die vorige geslag Ranger) tot R315 900 vir die 3.0 TDCi XLE 4x4-dubbelkajuit.

Kyk ook na:
Die Hilux-reeks is as volledige reeks steeds bobaas in Suid-Afrika. Die D-4D 3.0 Turbodiesel (120 Nm en 343 Nm) ontwikkel dalk minder wringkrag, maar hy troef die Ranger weer met krag, hoewel dit maar met ’n polonieskilbreedte is.

Die Hilux het egter meer beenruimte agter, en as jy (groot) mense agterin wil vervoer, kan dit belangrik raak. Die Nissan Navara-turbodiesel (2.5 dCi Turbodiesel: 128 kW/403 Nm; en 4.0 V6-petrol: 198 kW/385 Nm) kan ook oorweeg word, maar die pryse is ongeveer R12 000 duurder vir vergelykende modelle.

WegRy sê:
Die Ranger is tans die enigste bakkie wat lyk soos ’n bakkie moet lyk.

Originally published in WegRy #4 | Des 2007 - Jan 2008