Ná ’n partytjienaweek naby Benoni het ons een Sondagoggend besluit om met quad-fietse by ’n baan in die Witfontein-omgewing te gaan speel. Dit sou ons ook help om wakker te bly – ons was nogal uitgeput.

Ons was ses en ná ’n paar laaste verstellings is ons daar weg met twee quads en ’n ou Land Cruiser-plaasbakkie. Ek het die bakkie bestuur en die eienaar van die Cruiser was op een van die motorfietse. 

Ek het die motorfietse oor die hindernisse gevolg. Die eienaar was bang ek beskadig die Cruiser, en hy wou my nie my eie roete laat volg nie. Hy het net gesê: “Volg my!”
Na ons ’n rukkie op die baan gespeel het, het ons die 4x4-gebied gaan verken. En dis waar die moeilikheid begin het... 

Daar was ’n hoop sand wat te steil was vir die bakkie en ek moes toe noodgedwonge om dit ry. In my pad was ’n plaat modder waaroor ek toe stap om te toets of ek kan oorry. Behalwe ’n paar poeletjies het dit stewig genoeg gelyk. Laestrek-tweederat-voet-in-die-hoek!

Die Cruiser het soos ’n klip gesink en kon nêrens heen gaan nie. 

Dit blyk toe dat dit ’n sloot was wat onlangs toegegooi is en nog nie gekompakteer is nie – en die watertafel was vlak onder die oppervlak. 

Vier uur en drie gebreekte sleeptoue later is ons uiteindelik daar uit. 

PIETER SMUTS, Randfontein